රජයේ ප්‍රවෘත්ති දෙපාර්තමේන්තුවෙන් “උත්තමාභිවන්දනා”

ලාංකීය නිදහස් සටනේ ආරම්භය ලෙස සැලකෙන 1818 ඌව වෙල්ලස්ස අරගලය හා ඊට නායකත්වය දුන් කැප්පෙටිපොල දිසාව ප්‍රමුඛ විරුවන් සැමරීමේ උත්සවයක් ජනාධිපති මෛත්‍රීපාල සිරිසේනගේ ප්‍රධානත්වයෙන් ලබන 10 වැනි දා ප.ව.5.00ට බණ්ඩාරනායක ජාත්‍යන්තර සම්මන්ත්‍රණ ශාලාවේදී පැවැත්වීමට නියමිතව තිබේ.

රජයේ ප්‍රවෘත්ති දෙපාර්තමේන්තුව එය සංවිධානය කරනු ලබන අතර “උත්තමාභිවන්දනා” යන මැයෙන් මෙම සැමරුම් උත්සවය පැවැත්වේ.

කැප්පෙටිපොල මහ දිසාව ප්‍රමුඛ විරුවන් එවක අධිරාජ්‍යවාදීන් විසින් ඇතුළත් කර තිබුණු දේශද්‍රෝහී ලැයිස්තුවෙන් ඉවත් කර දේශප්‍රේමී වීරයන් බවට ඔසවා තැබීමට ජනාධිපතිතුමා විසින් පසුගියදා කටයුතු කරනු ලැබිණි.

ඒ හා සමගාමීව “ප්‍රථම නිදහස් අරගලයේ ප්‍රත්‍යාවලෝකනයක්” ලෙසින් මෙම උත්සවය සංවිධානය කරන බවයි රජයේ ප්‍රවෘත්ති දෙපාර්තමේන්තුව පවසන්නේ.

මෙම උත්සවයේ ප්‍රධාන දේශනය මහාචාර්ය කේ.එන්.ඕ.ධර්මදාස විසින් පවත්වන අතර, ජාතික නිදහස් සටන් සිංහල භාෂාව තුළින් විද්‍යමාන වන ආකාරය පිළිබඳ දේශනයක් මහාචාර්ය ජේ.බී.දිසානායක විසින් පැවැත්වීමට නියමිතව ඇත.

වාර්තා චිත්‍රපටයක්
එමෙන්ම, ඌව වෙල්ලස්ස නිදහස් අරගලය අළලා රජයේ චිත්‍රපට අංශය විසින් සකස් කරන ලද වාර්තා චිත්‍රපටයක් සහ එම අරගලය හා බැඳුනු ඓතිහාසික පසුබිම පිළිබඳ රජයේ ප්‍රවෘත්ති දෙපාර්තමේන්තුව විසින් සම්පාදිත ශාස්ත්‍රීය ග්‍රන්ථයක්ද මෙහිදී එළිදැක්වීමට නියමිතව තිබේ.

ජනාධිපතිතුමා විසින් දේශප්‍රේමීන් බවට ඔසවා තබමින් පසුගියදා ගැසට් මගින් ‍නිවේදනය කරන ලද වීරවරයන්ගේ නම් ඇතුළත් ඵලකයක් අනාගත පරම්පරාවන්හි දැනගැනීම පිණිස ශ්‍රී ලංකා ජාතික කෞතුකාගාරය සහ නිදහස් චතුරස්‍ර කෞත්‍රකාගාරය යන ආයතන වල ස්ථාපනය කිරීම සඳහා එම ආයතන ප්‍රධානීන් වෙත පිරිනැමීම සහ මහනුවර ශ්‍රී දළදා මාළිගා කෞතුකාගාරය වෙනුවෙන් දියවඩන නිළමේවරයා වෙත පිරිනැමීමද මෙහිදී සිදු කරන බව රජයේ ප්‍රවෘත්ති දෙපාර්තමේන්තුව වැඩි දුරටත් සඳහන් කරයි. 

Related posts

Comments are closed.

Top