ජිනීවා යෝජනාව ඉවත් කර නොගන්නා බව බ්‍රිතාන්‍යය කියයි

Report
2Shares

සංහිඳියාව, යුද අපරාධ සම්බන්ධ වගකීම සහ මානව හිමිකම් නගා සිටුවීම සඳහා ශ්‍රී ලංකාවද හවුල් කරගෙන එක්සත් ජාතීන් හමුවේ සම්මත කරගත් යෝජනා ඉදිරි ජගත් මානව හිමිකම් මණ්ඩල සැසිවාරයේදී ඉවත් කර නොගන්නා බව බ්‍රිතාන්‍ය රජය පවසයි.

ජිනීවාහිදී 2015 දී ඇති කරගත් සම්මුතියෙන් ඉවත් වීමට ශ්‍රී ලංකාවේ ආණ්ඩුවට හිතවාදී සාමිවරයකු ගෙනා යෝජනාවක් ප්‍රතික්ෂේප කරමින් බ්‍රිතාන්‍ය රාජ්‍ය අමාත්‍යවරයකු ශ්‍රී ලංකාවේ සිදුවී ඇති වෙනස සාමි මන්ත්‍රී මණ්ඩලය හමුවේ හඳුන්වා දුන්නේ “කලකිරවන තරමට මන්දගාමී” ලෙසටයි.

“ශ්‍රී ලංකාව සම්බන්ධ 30/1 යෝජනාවට 2015 දීත්, 34/1 යෝජනාවට 2017 දීත් එක්සත් රාජධානිය සමග සම අනුග්‍රාහකත්වය දැරූ ඇමරිකා එක්සත් ජනපදය එක්සත් ජාතීන්ගේ මානව හිමිකම් මණ්ඩලයෙන් ඉල්ලා අස්වීමෙන් අනතුරුව සහ යෝජනාවේ අවධාරණය කරන ලද කරුණු බොහොමයක් සම්බන්ධයෙන් අත් කරගෙන ඇති ප්‍රගතිය සලකා බැලූ කල, මේ යෝජනා අහෝසි කිරීම හෝ ඉල්ලා අස් කර ගැනීම සම්බන්ධයෙන් කවර තක්සේරුවක් කර ඇත්තේ දැ,” යි නේස්බි සාමිවරයා විසින් ශ්‍රී ලංකාව සම්බන්ධයෙන් පෙබරවාරි 5 දා පැවති විශේෂ කෙටි විවාදය ආරම්භ කරමින් නගන ලද ප්‍රශ්නයට රාජ්‍ය අමාත්‍යවරයා විසින් එම පිළිතුර දී තිබුනි.

නේස්බි සාමිවරයා ශ්‍රී ලංකාවේ ආණ්ඩුව වෙනුවෙන් බ්‍රිතාන්‍ය සාමි මන්ත්‍රී මණ්ඩලයේත් ජාත්‍යන්තර සභා වලත් දිගින් දිගටම පෙනී සිටින්නෙකි.

“ආණ්ඩුවේ ස්ථාවරය ආරම්භයේදීම පැහැදිලි කිරීමට කැමැත්තෙමි: මේ යෝජනා අහෝසි කිරීමට හෝ ඉල්ලා අස් කර ගැනීමට හෝ මහරැජිනගේ ආණ්ඩුවේ කිසිදු සැලසුමක් නැත,” යි විදේශ හා පොදුරාජ්‍ය මණ්ඩල රාජ්‍ය අමාත්‍ තරීක් අහ්මඩ් සාමිවරයා සභාවට දැනුම් දුන්නේය.

“සත්‍යය, යුක්තිය සහ නැවත සිදු නොවීම පිලිබඳ සහතිකයකින් තොරව කල් පවතින සංහිඳියාවක් ඇතිකර ගත නොහැකිය. 30/ 1 යෝජනාවට සම අනුග්‍රාහකත්වය දැක්වීම මගින් ශ්‍රී ලංකාව තමන් එය අනුමත කරන බවට පැහැදිලි ලෙස සංඥා කර තිබේ."

ඇමරිකා එක්සත් ජනපදය මානව හිමිකම් මණ්ඩලයෙන් ඉවත් වුවත් බ්‍රිතාන්‍යය, මැසිඩෝනියාව සහ මොන්ටිනීග්‍රෝ යන මුල් අනුග්‍රාහකයන් සමග යෝජනාවට හවුල් වීමට කැනඩාව හා ජර්මනිය එකඟ වී ඇති බව රාජ්‍ය අමාත්‍යවරයා සාමි මන්ත්‍රී මණ්ඩලයට දැනුම් දුන්නේය.

තවමත් ඉටු නොකළ පොරොන්දු

සංක්‍රාන්තික යුක්ති යාන්ත්‍රණයක් ස්ථාපිත කිරීම, සත්‍ය හා සංහිඳියා කොමිසමක් පිහිටුවීම, ත්‍රස්තවාදය වැළක්වීමේ පනත වහාම අහෝසි කොට අලුතින් පනතක් ගෙන ඒම සහ ත්‍රස්තවාදය වැළක්වීමේ පනත යටතේ රඳවාගෙන සිටින සිරකරුවන් නිදහස් කිරීම ආදිය ශ්‍රී ලංකාවේ ආණ්ඩුව පියවර ගැනීමට අසමත් වී ඇති ක්ෂේත්‍ර ලෙස ඔහු අවධාරණය කළේය.

ජිනීවා යෝජනා ක්‍රියාත්මක කිරීම සඳහා ශ්‍රී ලංකාවේ ආණ්ඩුව බ්‍රිතාන්‍යයෙන් කෝටි ගණනින් ආධාර ලබාගෙන තිබේ.

අමාත්‍යවරයා විසින් දැනුම් දෙන ලද පරිදි, ඒ වෙනුවෙන් බ්‍රිතාන්‍යයේ ගැටුම්, ස්ථාවරභාවය සහ ආරක්ෂාව සඳහා වන අරමුදලින් (CSSF) ශ්‍රී ලංකාවට දෙන මුදල් ප්‍රමාණය පවුම් ලක්ෂ අසූ තුනකි.

පවුල් නැවත පදිංචි කිරීම සහ සාමය නගා සිටුවීම සඳහා තවත් අමතර පවුම් දශලක්ෂයක් දෙන බව ආසියා කටයුතු භාර අමාත්‍ය මාර්ක් ෆීල්ඩ් විසින් ප්‍රකාශයට පත් කර ඇති බවද රාජ්‍ය අමාත්‍ය අහ්මඩ් සාමිවරයා වැඩිදුරටත් ප්‍රකාශ කළේය.

විවාදයට සහභාගි වෙමින් ආණ්ඩු පක්ෂයේම නේස්බි සහ ෆ්‍රම්ලිංටන් සාමිවරුන් මෙන්ම ඩල්ස්ටන් හි ලෝ සාමිවරයාද කරුණු දැක්වුයේ ශ්‍රී ලංකාව ඉකුත් සිව් වසර තුළ මානව හිමිකම් ක්ෂේත්‍රයේ ප්‍රගතියක් අත් කරගෙන ඇති බවටයි.

කෙසේ වෙතත්, යුද පීඩිත දෙමළ ජනතාවට යුක්තිය සලසා දීම සඳහා ජගත් ප්‍රජාව හමුවේ දුන් පොරොන්දු දිගටම කඩ කරන බවට ශ්‍රී ලංකාවේ රජය හයිබරි හි කොලින්ස් සාමිවරයාගේත්, නෝතෝවර් සාමිවරියගේත් දැඩි දෝෂ දර්ශනයට ලක්විය.

ජිනීවා යෝජනා ඉටු කිරීම සඳහා දැඩි ලෙස සහාය පල කරන්නකු ලෙස රාජ්‍ය අමාත්‍ය අහමඩ් විසින් හඳුන්වනු ලැබූ ශ්‍රී ලංකාවේ විදේශ අමාත්‍යවරයා පසුගිය 21 දා ලන්ඩනයේදී තමන් මෙන්ම ඩයස්පෝරා වාසී දෙමළ නියෝජිතයන්ද හමුවූ බව සාමි මන්ත්‍රී මණ්ඩලයට දැනුම් දෙන ලදී.

සම අනුග්‍රාහකයන්ට අමතරව එක්සත් ජනපදයේ, යුරෝපා සංගමයේ හා එක්සත් ජාතීන්ගේ මානව හිමිකම් මණ්ඩලයේ ද සහාය ලබා ශ්‍රී ලංකාව සම්බන්ධ ජිනීවා යෝජනාව සම්පුර්ණයෙන්ම ක්‍රියාත්මක කරවා ගත හැකි බවට විදේශ හා පොදුරාජ්‍ය මණ්ඩල රාජ්‍ය අමාත්‍ය අහ්මඩ් සාමිවරයා විශ්වාසය පල කළේය.

ජිනීවා යෝජනාවෙන් ඉවත් වීමේ අවශ්‍යතාව ජනාධිපති මෛත්‍රිපාල සිරිසේන දිගින් දිගටම පළකර ඇත.

හතලිස්වැනි ජගත් මානව හිමිකම් සමුළුව පෙබරවාරි 25 දා සිට මාර්තු 22 දක්වා ජිනීවා හිදී මුළු දීමට නියමිතය.