හිදැස: රුපියල් 1000 වතු කම්කරු සටන, ජිනීවා මානව හිමිකම් මණ්ඩලය හා අලුත් ව්‍යවස්ථාව

Report
6Shares

පසුගිය සතියේ දමිළ භාෂා පුවත්පත් වාර්තාකරණය මගින් ගැටළු ගණනාවක් ආවරණය කොට තිබිණි. එම ගැටළු මෙසේ කාණ්ඩගත කළ හැක. 1) වතු කම්කරුවන්ගේ වැ‍ටුප්. 2) ශ්‍රී ලංකාව සහ එක්සත් ජාතීන්ගේ මානව හිමිකම් කවුන්සිලය, සහ 3) නව ව්‍යවස්ථාවක් කරා වන පියවර ඒවා වේ.

වතු කම්කරුවන්ට ගෙවනා වැ‍ටුප් වල ගැටළුව සම්බන්ධයෙන් මින් පෙරද දමිළ භාෂා පුවත්පත් තුළ සාකච්ඡා ඇතිවී තිබිනි. පසුගිය වසරේදී වතු කම්කරුවන් විසින් සිය දෛනික මූලික වේතනය රුපියල් 1000 ක් කරන ලෙස ඉල්ලමින් විරෝධතා ගණනාවක් පැවැත්වූ අතර, එයට 2018 ඔක්තෝබර් මාසයේදී ගාලු මුවදොර පැවැත්වූ දැවැන්ත ඒකාබද්ධ විරෝධතාවයද අයත් විනි. මෙම ගැටළුව පසුගිය සතියේ පුවත්පත් වාර්තා අතර ප්‍රමුඛස්ථානය ලබාගත්තේ, වතු කම්කරුවන්ගේ දෛනික මූලික වැ‍ටුප රුපියල් 500 සිට රුපියල් 700 දක්වා වැඩි කළ බවට වතු හිමිකරුවන් විසින් කළ නිවේදනයකින් පසුය. (කෙසේ වෙතත් ගෙවීමේ අනෙකුත් ගැලපීම් හා සැකසීම් වලින් පසුව, වතු කම්කරුවෙකුගේ දිනක සමස්ත වේතනයේ සිදුවූ වෙනස වන්නේ දිනකට රුපියල් 50 ක් පමණි.)

රජයට අයත් තිනකරන් පුවත්පත සහ වීරකේසරී සහ තිනකුරල් යන දමිළ භාෂා පුවත්පත් තුනම මෙම නිවේදනය වාර්තා කොට තිබිණි. වීරකේසරී පුවත්පත මගින් දිනක අවම වේතනය රුපියල් 1000ක් කරන ලෙසින් ඉල්ලා දිගින් දිගටම දියත් වන විරෝධතාවයන් සිය කතුවැකිය තුළ සාකච්ඡාවට ගෙන තිබිණි. එම කතුවැකිය මගින් වතු කම්කරුවන්ගේ ඉල්ලීම් සංක්ෂිප්තයක් ලෙසින් දක්වා තිබූ අතර, අතීතයේ ඔවුන්ගේ වැ‍ටුප් වැඩිවූ ආකාරයද විස්තරාත්මකව දක්වා තිබිණි. කෙසේ වුවත් රජයට අයත් පුවත්පත වන තිනකරන් මගින් එහි කතුවැකිය තුළ සාකච්ඡාවට ගෙන තිබුණේ, වතු හිමිකරුවන් විසින් නිවේදනය කළ ආකාරයට වූ වැ‍ටුප් වැඩිවීම ප්‍රමාණවත් වේද නැතිනම් නොවේද යන්නයි. එම කතුවැකිය මගින් විස්තර කොට තිබුණේ මෙම වැ‍ටුප් වැඩිකිරීමේ ඉල්ලීම සිදුකළ පසුතලයයි. එනම් වතු හිමියන් සහ වතු කම්කරුවන් නියෝජනය කරනා වෘත්තිය සමිති අතර ද්විවාර්ෂිකව අත්සන් කෙරුනු සාමූහික ගිවිසුමක් මගින් මෙය සිදු කෙරී තිබිණි. එසේම කතුවැකියෙන් උපුටා දැක්වුණේ, මෙම ඉල්ලීම වෙනුවෙන් තනි පුද්ගලයන් සහ ආයතන මගින් ලබාදුන් අතිමහත් සහයෝගයයි.


එක්සත් ජාතීන්ගේ සංවිධානයට ලබාදුන් පොරොන්දු

පසුගිය සති වලට සමාන ලෙසින් මෙම සතියේදීද දමිළ භාෂා පුවත්පත් මගින්, ලඟ එන එක්සත් ජාතීන්ගේ මානව හිමිකම් කවුන්සිලයේ සැසිවාරයන්ට අදාළ වන කරුණු සම්බන්ධයෙන් සාකච්ඡා කොට තිබිණි. මෙම වාර්තාකරණය පසුබිම තිබූ සන්දර්භය වූයේ, පැවැත්වීමට නියමිත සැසිවාරයන්ට අමතරව කවුන්සිලය වෙත සිය ප්‍රතිඥා ඉෂ්ට කිරීම සඳහා එක්සත් ජාතීන්ගේ සංවිධානය මගින් ශ්‍රී ලංකාව වෙත ලබා දී තිබූ කාල සීමාව මෙම වසරේදී අවසාන විමයි. දෙමළ ජාතික සන්ධානයේ නායක ආර්.සම්බන්ධන් උපුටා දක්වමින් වීරකේසරී මගින් වාර්තා කොට සිටියේ, ශ්‍රී ලංකාවේ දමිළ ප්‍රජාවට අදාළ වන කරුණු සම්බන්ධයෙන් ජාත්‍යන්තර ප්‍රජාවගේ වන අවධානය වඩාත් තීව්‍ර වී ඇති බවයි. මීට අමතරව, එක්සත් ජාතීන්ගේ සංවිධානය වෙත වූ සිය ප්‍රතිඥා ඉෂ්ට කිරීම වෙනුවෙන් රජය මගින් ක්‍රියාත්මක කළ යම් යම් ක්‍රියාකාරකම් සම්බන්ධයෙන්ද දමිළ පුවත්පත් මගින් වාර්තා කොට තිබූ අතර ඒවා සාකච්ඡාවටද ගෙන තිබිණි. උදාහරණයක් ලෙසින් දක්වන්නේ නම්, තිනකරන් මගින් දෙමළ ජාතික සන්ධාන පාර්ලිමේන්තු මන්ත්‍රී ශිවශක්ති ආනන්දන් සමගින් කළ සම්මුඛ සාකච්ඡාවක් පළ කොට තිබිණි. එහිදී ඔහු සඳහන් කොට සිටියේ, හමුදාව විසින් අත්පත් කොටගෙන සිටිනා ඉඩම් නැවත ඒවායේ අයිතිකරුවන් වෙත නිදහස් කිරීම යනු උතුරේ සහ නැගෙනහිර මුස්ලිම් ජනතාවට ගැහැටක් වූ ප්‍රශ්න සඳහා වන වඩා විශාල විසඳුමක එක් පාර්ශවයක් පමණක් බවයි. ඔහු ප්‍රකාශ කොට සිටියේ, අනෙකුත් අවශ්‍ය විසඳුම් සඳහා බලාත්කාරයෙන් කළ අතුරුදන් කරවීම් සම්බන්ධයෙන් කටයුතු කිරීම සහ යුද අපරාධ චෝදනා සම්බන්ධයෙන් විමර්ශනය කිරීමද ඇතුලත් වන බවයි. තවදුරටත් ඔහු විසින් පෙන්වා දී තිබුණේ, දමිළ ජනතාවට ඔවුන්ගේ ඉල්ලීම් සම්බන්ධයෙන් ආමන්ත්‍රණය කොට විසඳුමක් සපයා දීම සඳහා දේශීය -වඩාත් නිවැරදිව ගත හොත් දකුණේ- දේශපාලකයින් කෙරෙහි කිසිදු විශ්වාසයක් නොමැති හෙයින්, ඔවුන්ට ජාත්‍යන්තර ප්‍රජාව මගින් ලබාදෙන සහාය මත යැපීමට සිදුවී ඇති බවයි.

මේ අතර තිනකුරල් පුවත්පතද එහි දේශපාලන අතිරේකය මගින් ආවරණය කොට තිබුණේ, පැවැත්වීමට නියමිත එක්සත් ජාතීන්ගේ මානව හිමිකම් කවුන්සිලයේ සැසිවාර යන පසුතලයේදී රජය මගින් හමුදාව විසින් අත්පත් කොටගෙන තිබූ ඉඩම් නැවත එම ඉඩම්වල අයිතිකරුවන්ට පැවරීමේ ගැටළුවයි. මෙම ලිපිය මගින් ප්‍රකාශ කෙරුණු ආකාරයට, රජය විසින් මෙම ඉඩම් නැවත හිමිකරුවන්ට ලබාදීමට මුල පුරා ඇත්තේ කරුණු දෙකක් පෙරදැරි කරගනිමිනුයි. එනම් 1) ජිනීවා හිදී රජයට වාසි සහගත තත්වයක් ලබාගැනීමට සහ 2) උතුරේ සහ නැගෙනහිර දමිළ ප්‍රජාවගේ ඡන්ද තමන්ට ලබාගැනීමට වේ. මෙම කරුණු පසුතලයේ ලා බැලූ විට රජයේ මෙවැනි ක්‍රියාකාරකම් දමිළ ප්‍රජාව වෙත 'අනතුරුදායක' බව උක්ත ලිපිය මගින් විස්තර කොට තිබිනි.


නව ව්‍යවස්ථාවක් කරා වූ පියවර

මින් පෙර සතිවල වූ පුවත්පත් වාර්තාකරණයන්ට හා සැස‍ඳෙන ලෙසින්ම, මෙම පසු වූ සතියේද දමිළ භාෂා පුවත්පත් මගින් නව ව්‍යවස්ථාවක් කරා වන පියවරට අදාළ කරුණු සාකච්ඡා කොට තිබුණි. කෙසේ වුවත් වතු කම්කරුවන්ගේ වැ‍ටුප් සම්බන්ධ ගැටළුව සාකච්ඡා වීම නිසාවෙන්, නව ව්‍යවස්ථාවක් වෙත වන පියවර සම්බන්ධයෙන් මින් පෙර සතිවල වූ ආවරණයට වඩා අඩු ආවරණයක් පසු වූ සතියේ පුවත්පත් තුළ දක්නට ලැබිණි. තිනකුරල්, තිනකරන් හා වීරකේසරී යන දමිළ භාෂා ජාතික පුවත්පත් දෙකම මගින් මේ සම්බන්ධයෙන් විවිධ දෘෂ්ටීන් දක්වමින් ලිපි පළ කොට තිබිණි. වීරකේසරී පුවත්පත මගින් සිය දේශපාලන අතිරේකයේ, දෙමළ ජාතික සන්ධානය මගින් නව ව්‍යවස්ථාවක් සඳහා බල කිරීම යන දේශපාලන වාතාවරණය සාකච්ඡාවට ගෙන තිබිණි. නව ව්‍යවස්ථාවක් කරා වන ක්‍රියාවලියේදී මුහුණ පෑමට වන අභියෝගයන් අවධාරණය කරන අතරතුරදීම, වීරකේසරී මගින් තවදුරටත් විස්තර කොට තිබුණේ මෙම පියවර සාර්ථක වීම සඳහා උපකාරී වන වාතාවරණයක් නිර්මාණය කිරීම වෙනුවෙන්, පවත්නා රජය රඳවා තබාගැනීමේ වැදගත්කමයි.

වෙරිටේ රිසර්ච් ප්‍රකාශනයකි